MOBILIZAMOS A NOSA SOLIDARIEDADE ANTE A SUSPENSIÓN DA AXUDA INTERNACIONAL DOS EUA

O 24 de xaneiro de 2025, a nova administración estadounidense decretou a suspensión inmediata de fondos nas obrigas e desembolsos de asistencia exterior a países estranxeiros, organizacións non gobernamentais, organizacións internacionais e outros contratistas gobernamentais.

Esta decisión impactou gravemente os proxectos humanitarios e educativos das nosas redes irmás, o Servizo Xesuíta a Refuxiados e Fe e Alegría, obrigándoos a interromper o traballo vital que realizan con miles de persoas vulnerables en diversas partes do mundo.

O Chad, Colombia, O Salvador, Etiopía, Honduras, A India, Iraq, O Paraguai, Sudáfrica, Sudán do Sur, Tailandia e Uganda son os países nos que se suspenderon actividades esenciais. Hai unha semana recibiron a notificación oficial da suspensión do financiamento de todos os proxectos financiados polo goberno dos Estados Unidos, con efecto inmediato. O impacto foi devastador.

Medidas deste tipo, ademais de xerar un sufrimento adicional para aqueles que xa viven en extrema vulnerabilidade, poñen en cuestión os principios de xustiza e solidariedade que guían a nosa acción e que, confiamos, rexen tamén a acción global de actores gobernamentais e non gobernamentais. En contextos de especial fraxilidade, a comunidade internacional ten a responsabilidade de protexer e garantir os dereitos fundamentais de todas as persoas, como expresión concreta da igual dignidade de cada ser humano.

Pola nosa banda, non queremos quedar inactivos e queremos contribuír a esta mobilización de sensibilidade, pensamento e acción. As ONG xesuítas de cooperación internacional Alboan e Entreculturas, como parte da Rede Xavier e do Sector Social dos xesuítas en España, promovemos unha campaña de apoio e solidariedade coas nosas redes irmás internacionais Fe e Alegría e o Servizo Xesuíta a Refuxiados, damnificadas polos recortes inmediatos.

A nosa intención é seguir camiñando ao carón das persoas máis vulnerables, das persoas descartadas, e sen renunciar á esperanza. Sempre desde o ánimo, como nos insta o Papa Francisco, a mirar a nosa existencia desde a esperanza, “a máis pequena das virtudes, pero a máis forte”.

Contamos co teu apoio e colaboración a través das seguintes canles: